46 nafar ishchi xodimlarni qamrab olgan Ekspluatatsiya-montaj bo‘linmasida avvallari ishchilar uchun sharoit va texnikalar imkoniyati yetarli darajada emas edi.

Viloyat hokimligi tomonidan ajratilgan mablag‘ hisobiga bo‘linma uchun yangi, zamonaviy va barcha sharoitlarga ega bino qurib bitkazildi.

Yangi binoning ochilish marosimida Namangan viloyati hokimi, IIV JXD YHXX boshlig‘i hamda viloyat IIB boshlig‘i ishtirok etishdi. Ramziy lentalar kesilgach, viloyat hokimi so‘z olib, ushbu sharoitlarning barchasi xodimlarga qulaylik yaratish barobarida ish sifatini oshirishga xizmat qilishini aytib, yo‘l yotiq chiziqlari uchun tayyorlanadigan bo‘yoqlarning sifatini yanada oshirish lozimligini alohida ta’kidladi.

Shundan so‘ng IIV JXD YHXX boshlig‘i polkovnik O.Ch.Saidov barcha ishchi xodimlarni tabriklab, bundan buyon berilgan imkoniyat va sharoitlarga munosib xizmat qilish, yo‘llarda avtohalokatlarni oldini olish, harakat ishtirokchilariga qulayliklar yaratish borasida sohaga yangi yo‘nalishlarni tatbiq etish, rahbardan to ishchigacha o‘z ustida tinimsiz izlanish, tajriba va malaka oshirib borish lozimligini ta’kidladi.

Tabrik nutqi so‘nggida IIV JXD YHXX tomonidan bo‘linmaga xizmatda foydalanish uchun Avtokran-manipulyator va avtomobil yo‘llarini yuvuvchi maxsus transport vositalari topshirildi.

Shuni alohida ta’kidlash lozimki, bo‘linma ishchilari maxsus forma, moddiy texnik baza, maxsus avtomobillar va ish qurollari bilan to‘liq ta’minlangan.