Bugun Oʻzbekiston Respublikasi Oliy Majlisi Senatining Mudofaa va xavfsizlik masalalari qoʻmitasi majlisida “Oʻzbekiston Respublikasining Maʼmuriy javobgarlik toʻgʻrisidagi kodeksiga oʻzgartirish va qoʻshimchalar kiritish haqida”gi Qonun muhokama qilindi.

Maʼmuriy Javobgarlik toʻgʻrisidagi Kodeksning ayrim moddalariga quyidagicha qoʻshimcha va oʻzgartirishlar kiritilishi nazarda tutilgan:

- 17 prim bir moddasi oltinchi qism bilan toʻldirilib, unda, foto va video qayd etish texnika vositalari orqali aniqlangan huquqbuzarliklar haqida oʻz vaqtida fuqaroni xabardor etish va chora koʻrish bilan bogʻliq yangi norma kiritilmoqda. Bunda, yoʻl harakati qoidalari buzilishiga oid maʼlumotlar 48 soat ichida YHXXga yuborilishi, aks holda haydovchi maʼmuriy javobgarlikka tortilmasligini belgilash taklif etilmoqda.

- 17 prim bir moddasining beshinchi qismiga tez tibbiy yordam va yongʻin-qutqaruv boʻlinmalarining transport vositalari tomonidan kechiktirib boʻlmaydigan xizmat vazifalarini bajarganlikni tasdiqlovchi hujjatlar taqdim etilishi talab qilinmasligi belgilanmoqda.

128-modda “yuk avtomobillarida yoʻlning chetki chap qatorida harakatlanish (ruxsat etilgan hollar bundan mustasno) jumlalari bilan toʻldirilish taklif etilmoqda.

“Skuter” va “individual harakatlanish vositalari”ning haydovchilariga Yoʻl harakati qoidalarini buzganlik uchun Maʼmuriy javobgarlik toʻgʻrisidagi kodeksga tegishli oʻzgartirishlar kiritish taklif etilib, yuqorida keltirib oʻtilgan barcha takliflar keng qamrovda muhokama qilindi.