Poytaxt ko‘chalarida kuchaytirilgan tarzdagi tungi reyd tadbirlari davomida:

- 2021-yil 15-sentabr kuni soat 01:00 larda Chilonzor tumani, Qatortol ko‘chasida YPX inspektorlari B.Kosimov va S.Nosirovlar tomonidan “Lacetti” rusumli avtomobil to‘xtatilib tekshirilganda, salonda bo‘lgan yo‘lovchi o‘zining turli xatti-harakatlari bilan xodimlarda shubha uyg‘otgan. Xolis va guvohlar ishtirokidagi tekshiruv davomida 1986-yilda tug‘ilgan, yo‘lovchi S. D. ning yonidan jigar rangli, o‘tkir hidli, saqichsimon modda topilib tegishli hujjatlar rasmiylashtirilgan.

Holat batafsil o‘rganilishi uchun fuqaro S. D. va topilgan modda Chilonzor tumani IIO FMBga topshirilgan.

- 2021-yil 15-sentabr kuni soat 06:30 larda Mirzo Ulug‘bek tumani, Parkent ko‘chasida YPX xodimlari D.Ahmedov va A.Xubbimovlar tomonidan “Nexia” rusumli avtomobil to‘xtatilib tekshirilganda, avtomobil qo‘l tormozi oldida tamaki qutisiga solingan, selofan paketda bo‘lgan oq rangli, kukunsimon modda topilib xolis va guvohlar ishtirokida tegishli hujjatlar rasmiylashtirilgan.

Holat batafsil o‘rganilishi uchun haydovchi, 1992-yilda tug‘ilgan A. S. va topilgan modda Mirzo Ulug‘bek tumani IIO FMBga topshirilgan.

- 2021-yil 15-sentabr kuni soat 16:00 larda, Yashnobod tumani, Mahtumquli ko‘chasida YPX xodimlari Z.Ergashev va J.Inoyatovlar tomonidan “Lacetti” rusumli avtomobil to‘xtatilib tekshirilganda, haydovchi, 1970-yilda tug‘ilgan Y. P. ning ma’lumotlari planshet moslamasi orqali, yagona dasturda tekshirilib ko‘rilganda, ushbu fuqaro O‘zbekiston Respublikasi Jinoyat Kodeksining 168-moddasi 4-qismida ko‘rsatilgan jinoyatni sodir qilganlikda gumonlanib, 2021-yil 1-sentabrdan buyon qidiruvda ekanligi aniqlangan va tegishli hujjatlar rasmiylashtirilib, fuqaro Y. P. Mirzo Ulug‘bek tumani IIO FMBga topshirilgan.

- 2021-yil 16-sentabr kuni soat 02:00 larda Chilonzor tumani, Chilonzor ko‘chasida YPX xodimlari B.Qosimov va S.Nosirovlar tomonidan “Spark” rusumli avtomobil to‘xtatilib tekshirilganda, avtomobil salonidan , 2 dona “Tropikamide” nomli xamda 23 dona “Regapen” nomli psixotrop dori vositalari, shuningdek 2 dona selofan paketga o‘ralgan, jigar rangli, o‘tkir hidli, saqichsimon moddalar topilib, xolis va guvohlar ishtirokida tegishli hujjatlar rasmiylashtirilgan.

Holat batafsil o‘rganilishi uchun haydovchi, 1992-yilda tug‘ilgan S. X. va topilgan vositalar Chilonzor tumani IIO FMBga topshirilgan.

Reyd tadbirlari davom etadi.