Davlatimiz rahbari topshirigʻiga asosan, Toshkent shahrida jamoat transporti tizimidagi muammolarni bartaraf etish orqali aholiga qulay transport xizmat koʻrsatishni tashkil etish boʻyicha idoralararo tezkor shtab tuzildi.

Yoʻnalishlardagi avtobuslarning harakatlanishini toʻgʻri va samarali tashkil etish maqsadida, “Toshshahartransxizmat” AJ ga tegishli 8 ta avtobus saroylari va yoʻnalishlarga Ichki ishlar vazirligidan 212 nafar xodimlar jalb etilib, Vazirlik qaramogʻiga shaharning 7, 8 va 18-sonli avtobus saroylari biriktirildi.

Shuningdek, avtoparklarga Ichki ishlar vazirligi tasarrufida boʻlgan 30 ta “ISUZU” rusumli yoʻlovchi tashuvchi avtobuslar ajratildi.

Zaruriy taʼmirlash ishlarini amalga oshirish natijasida, joriy yilning 15-dekabr kuni qoʻshimcha 75 ta avtobuslar jalb qilinib, jami yoʻnalishga jalb qilingan avtobuslar soni 945 taga yetkazildi.