Ijtimoiy tarmoqda haydovchi orqa tomondagi davlat raqam belgisi boʻlmagan, oldingi tomonida esa 70005DAV davlat raqam belgisi boʻlgan “Trailblazer” rusumli avtomobilda harakatlanib ketayotganligi aks etgan video tarqalib, keng jamoatchilik muhokamalariga sabab boʻldi.

Video Qashqadaryo viloyati IIB JXX YHXB xodimlari tomonidan oʻrganilganda, ushbu “Trailblazer” rusumli 70005DAV davlat raqam belgili avtomobil yon oynalarining tusi tegishli ruxsatnomasiz qoraytirilganligi ham aniqlangan. Avtomobil haydovchisi, 1976-yilda tugʻilgan E. T. ga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksning 125-moddasi beshinchi qismi hamda 126-moddasi tartibida maʼmuriy bayonnoma rasmiylashtirilib, ushbu transport vositasi vaqtincha saqlash uchun jarima maydoniga qoʻyilgan.

Barcha haydovchilardan qoidalarga rioya qilishlarini soʻraymiz.