Ijtimoiy tarmoqda “Lacetti” rusumli, 30G002VA davlat raqam belgili avtomobil haydovchisi xavfli manyovrlar bilan qarama-qarshi harakatlanish uchun moʻljallangan tomonga oʻtib harakatlanganligi, shuningdek, avtomobiliga ruxsat etilmagan maxsus yorituvchi qurilma (migalka) oʻrnatilganligi aks etgan video tarqaldi va keng jamoatchilik muhokamalariga sabab boʻldi.

Video yuzasidan Samarqand viloyati IIB YHXB masʼul xodimlari tomonidan surishtiruv olib borilib, qoidalarni qoʻpol tarzda chetlab oʻtgan “Lacetti” rusumli, 30G002VA davlat raqam belgili avtomobil haydovchisi, 2001-yilda tugʻilgan Sh.N.ga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksning 127, 128⁵, 135-moddalari tartibida bayonnoma rasmiylashtirilib, avtomobil vaqtincha saqlash uchun jarima maydoniga qoʻyildi.

Barcha haydovchilardan qoidalarga rioya qilishlarini, yoʻllarda oʻzi va atrofdagilar salomatligini xavf ostiga qoʻymasliklarini soʻraymiz.