Ijtimoiy tarmoqda "Howo" rusumli, 01 324DGA davlat raqam belgili yuk avtomobili haydovchisi transport vositalarining oqimiga qarama-qarshi tarzda harakatlanganligi aks etgan video tarqaldi va keng jamoatchilik muhokamalariga sabab bo‘ldi.

Video yuzasidan Samarqand viloyati IIB YHXB mas’ul xodimlari tomonidan surishtiruv olib borilib, 2021-yil 10-dekabr kuni Samarqand viloyati hududidan o‘tgan M-37 avtomobil yo‘lining 36-kilometrida, qoidalarni qo‘pol tarzda chetlab o‘tgan "Howo" rusumli, 01 324DGA davlat raqam belgili yuk avtomobili haydovchisi D. R.ga nisbatan O‘zbekiston Respublikasi Ma’muriy javobgarlik to‘g‘risidagi Kodeksning 128⁵-moddasi tartibida bayonnoma rasmiylashtirildi.

Barcha haydovchilardan qoidalarga rioya qilishlarini, yo‘llarda o‘zi va atrofdagilar salomatligini xavf ostiga qo‘ymasliklarini so‘raymiz.