Majlis avvalida idoralararo ishchi guruhi tomonidan Xorazm viloyatida xalqaro va davlat ahamiyatidagi yo‘llarda yo‘l-transport hodisalarining oldini olish maqsadida xavfli joylarni aniqlash bo‘yicha o‘tkazilgan o‘rganish natijalari tanqidiy muhokama qilindi.

Shundan so‘ng O‘zbekiston Respublikasi Bosh prokuraturasi, Transport vazirligi huzuridagi Avtomobil yo‘llari qo‘mitasi, Maktab va maktabgacha ta’lim vazirligi hamda boshqa davlat tashkilotlarining mas’ullari oldinda turgan vazifalar yuzasidan o‘z fikrlarini bildirishdi.

Majlis davomida IIV Jamoat xavfsizligi departamenti Yo‘l harakati xavfsizligi xizmati rahbariyati ham so‘zga chiqib, xizmat tomonidan "Xavfsiz bolalik" tamoyili asosida so‘nggi vaqtlarda amalga oshirilgan ishlar natijasida yurtimizda bolalar ishtirokida sodir bo‘ladigan og‘ir oqibatli avtohalokatlar soni sezilarli darajada kamayganini ta’kidladi. Shu bilan birga, yo‘l qo‘yilgan kamchiliklar haqida ham batafsil ma’lumot berildi.

Xususan, ta’lim muassasalarida bolalarning yo‘l harakati qoidalarini yetarli darajada o‘zlashtirishlari uchun 5 mingdan ortiq "Yo‘l harakati qoidalarini o‘qitish sinfxonalari" jihozlanib, foydalanishga topshirilganiga qaramasdan, ayrim maktablarda ushbu jihozlar yaroqsiz holatga keltirilgani yoki noto‘g‘ri maqsadlarda foydalanilayotgan holatlar aniqlangani alohida ta’kidlab o‘tildi.

Majlis yakunida yo‘l-transport hodisalarining oldini olishda barcha tashkilot va muassasalar teng darajada mas’ul ekanligi, shu sababli har bir idora o‘z vazifasiga vijdonan yondashishi lozimligi ta’kidlandi hamda mutasaddi rahbarlarga zarur topshiriqlar berildi.