2021-yil 19-noyabr kuni Toshkent viloyati hududida o‘tkazilgan “Xavfsiz hudud” keng qamrovli profilaktik tadbiri doirasida Toshkent viloyati IIBB YHXB katta inspektori A.Pirdavlatov va inspektor S.Umarovlar Qibray tumani “May” M.F.Y. hududida xizmat olib borayotgan vaqtda, “Spark” rusumli avtomobil haydovchisi YPX xodimlarini ko‘rib ortga qayrilib olganligini payqashgan va shubxali haydovchining ortidan kuzatib borishgan. Planshet moslamasi yordamidagi tekshiruv davomida mazkur avtomobil bilan bog‘liq bo‘lgan 6 million so‘mdan ortiq qarzdorlik mavjudligi aniqlangan. Xodimlar maxsus vositalar orqali haydovchidan avtomobilni to‘xtatishini so‘rashgan. Haydovchi to‘xtaganidan so‘ng xolis va guvohlar ishtirokidagi tekshiruv davomida, haydovchi, 1965-yilda tug‘ilgan T.N. boshqaruvidagi avtomobilning salon qismidan 5 dona gugurt qutisiga solingan yashil rangli, o‘tkir hidli, quritilgan giyohvandlik vositasiga o‘xshash modda topilgan. Shundan so‘ng, haydovchi va topilgan modda Qibray tumani IIBga topshirilgan.

Holat yuzasidan o‘tkazilgan sudga oid ekspertiza natijasiga ko‘ra, topilgan modda og‘irligi 125 grammga tengligi, ushbu modda “marixuana” giyohvandlik moddasi ekanligi aniqlangan.

Holat yuzasidan Qibray tumani IIB Tergov bo‘limi tomonidan O‘zbekiston Respublikasi Jinoyat Kodeksining 276-moddasi 2-qismi “a” bandiga asosan jinoyat ishi qo‘zg‘atilgan.