Qashqadaryo viloyati avtomobil yoʻllaridagi tekshiruvlar davomida:

- 2022-yil 22-aprel kuni soat 11:50 larda Qarshi shahar hududida xizmat olib borayotgan YPX xodimi S.Norimov tomonidan toʻxtatilgan “Spark” rusumli avtomobil haydovchisi 17 yoshli S.Gʻ. ekanligi, haydovchilik huquqi boʻlmay turib avtomobil boshqarganligi aniqlangan. Qoidabuzarlik holati belgilangan tartibda rasmiylashtirilib, avtomobil vaqtincha saqlash uchun jarima maydoniga qoʻyilgan.

- 2022-yil 24-aprel kuni Shahrisabz shahrida xizmat olib borayotgan YPX xodimi M.Roʻziqulov tomonidan “Nexia” rusumli avtomobil toʻxtatilib tekshirilganda, haydovchi, 1987-yilda tugʻilgan M.K. transport vositasining yukxonasida inson tanasiga shikast yetkazishi mumkin boʻlgan “bita” tayogʻini saqlab yurganligi maʼlum boʻlgan. Ushbu fuqaro bilan profilaktik suhbat oʻtkazilib, “bita” tayogʻi hududiy IIBga dalolatnoma bilan topshirilgan.

Qashqadaryo viloyati hududida jinoyatchilikka qarshi kurashish, avtomobil yoʻllarida yoʻl-transport hodisalarining oldini olish borasidagi chora-tadbirlar, tekshiruvlar va reydlar davom etmoqda. Yoʻllarda maxsus radar moslamalari bilan jihozlangan avtomobillar faoliyati davomida 120-150 km/soat atrofidagi tezlikda harakatlanuvchi “uchar” haydovchilar boshqaruvidagi transport vositalari qayd etilib, tegishli choralar koʻrilmoqda.

Barcha yoʻl harakati qatnashchilaridan qoidalarga rioya qilib harakatlanishlarini soʻraymiz.