2021-yil 1-dekabr kuni Surxondaryo viloyati, Oltinsoy tumani, "Qoratepa" mahallasi hududidan o‘tgan 4Р-100 avtomobil yo‘lining 150-kilometrida xizmat olib borgan YPX xodimi Sh. Sharipov "Nexia" rusumli avtomobil haydovchisini to‘xtatgan. Tekshiruv davomida haydovchining me’yoriy hujjatlari yo‘qligi ma’lum bo‘lgan va unga nisbatan ma’muriy bayonnoma rasmiylashtirilib, avtomobil vaqtincha saqlash uchun jarima maydoniga joylashtirilgan. Oradan biroz vaqt o‘tgandan so‘ng, haydovchi A. Q. avtomobilini jarima maydonidan olib chiqish va ko‘rilgan chorani bekor qilinishini so‘rab YPX xodimiga 1.000.000 (bir million) so‘m miqdorida pora taklif qilgan. YPX xodimi viloyat IIB boshlig‘i nomiga bildirgi orqali murojaat qilib, pora taklif qilgan fuqaroga nisbatan qonuniy chora ko‘rilishini so‘ragan.

Huquqni muhofaza qiluvchi organ xodimlari tomonidan hamkorlikda o‘tkazilgan tezkor tadbir davomida shu kuni soat 20:30 larda 1992-yilda tug‘ilgan fuqaro A. Q. Oltinson tumani, "Bibizaynab" mahallasi hududida joylashgan jarima maydoni yonida YPX xodimi Sh. Sharipovga 1.000.000 (bir million) so‘m miqdoridagi pullarni pora tariqasida berayotgan vaqtda daliliy ashyolar bilan qo‘lga olingan va holat tegishli tartibda rasmiylashtirilgan. Mazkur holat yuzasidan Oltinsoy tumani prokuraturasi tomonidan fuqaro A. Q. ga nisbatan O‘zbekiston Respublikasi Jinoyat Kodeksining 211-moddasi tartibida jinoyat ishi qo‘zg‘atilib, dastlabki tergov harakatlari olib borilmoqda.