2021-yil 17-dekabr kuni soat 09:30 larda, Surxondaryo viloyati, Termiz shahri, R. Soatova ko‘chasida xizmat olib borayotgan YPX xodimi Z. Xodjayev tomonidan "Cobalt" rusumli avtomobil haydovchisi to‘xtatilgan. Tekshiruv davomida, ushbu avtomobilning yon orqa oynalari tusi tegishli ruxsatnomasiz qoraytirilganligi ma’lum bo‘lgan va haydovchi D.T. ga nisbatan O‘zbekiston Respublikasi Ma’muriy javobgarlik to‘g‘risidagi Kodeksning 126-moddasi 1-qismi tartibida bayonnoma rasmiylashtirilib, avtomobil vaqtincha saqlash uchun jarima maydoniga qo‘yilgan.

Shundan so‘ng, haydovchi D.T. avtomobilini jarima maydonidan olib chiqish evaziga YPX xodimiga 200 (ikki yuz) AQSH dollari miqdoridagi pullarni pora tariqasida taklif qilgan. YPX xodimi viloyat IIB boshlig‘i nomiga bildirgi orqali murojaat qilib, pora taklif qilayotgan fuqaroga qonuniy chora ko‘rilishini so‘ragan.

YPX xodimining bildirgisi asosida huquqni muhofaza qiluvchi organ xodimlari tomonidan tezkor tadbir o‘tkazilib, 2021-yil 17-dekabr kuni soat 17:50 larda, fuqaro D.T. Termiz shahar IIB YHXX binosi yaqinida 1.850.000 (bir million sakkiz yuz ellik ming) so‘m miqdoridagi pullarni pora tariqasida YPX xodimiga berayotgan vaqtda qo‘lga olingan.

Hozirda ushbu holat yuzasidan Termiz shahar prokuraturasi tomonidan tergovoldi surishtiruv harakatlari olib borilmoqda.