Yo‘llarda YPX xodimlari tomonidan tekshiruvlar davomida:

- 2021-yil 7-oktabr kuni soat 10:10 larda, Mirzo Ulug‘bek tumani, Parkent ko‘chasida YPX xodimi Sh. Qurbonov tomonidan “Captiva” rusumli avtomobil to‘xtatilib, haydovchi, 1985-yilda tug‘ilgan N. R. ning ma’lumotlari planshet moslamasi yordamida tekshirilganda, fuqaro N. R. O‘zbekiston Respublikasi Jinoyat Kodeksining 167-moddasi 3-qismi bilan ayblanib, 2021-yil 27-mart kunidan buyon qidiruvdaligi ma’lum bo‘lgan.

Tegishli hujjatlar rasmiylashtirilib, fuqaro N. R. Mirzo Ulug‘bek tumani IIO FMBga topshirilgan.

- 2021-yil 7-oktabr kuni soat 15:10 larda, Bektemir tumani hududida joylashgan “Sharq” YPX maskanida YPX xodimlari A.Po‘latov va J.To‘raboyevlar tomonidan Toshkent viloyatidan Toshkent shahriga kirib kelayotgan “Cobalt” rusumli avtomobil to‘xtatilib tekshirilganda, haydovchi, 1971-yilda tug‘ilgan T. A. ko‘rinishi va turli xatti-harakatlari bilan xodimlarda shubxa uyg‘otgan. Xolis va guvohlar ishtirokidagi tekshiruv davomida haydovchi T. A. ning cho‘ntagidan syellofanga o‘ralgan, jigar rangli, o‘tkir hidli, saqichsimon modda topilgan.

Mazkur holat yuzasidan tegishli hujjatlar rasmiylashtirilib, haydovchi T. A. va topilgan modda Bektemir tumani IIO FMBga topshirilgan.

Yo‘llarda reyd tadbirlari va tekshiruvlar davom etmoqda.