2022-yil 11-fevral kuni soat 21:00 larda Termiz tumanida xizmat olib borayotgan YPX xodimi A.Boltayev tomonidan “Isuzu” rusumli yuk avtomobili haydovchisi toʻxtatilib tekshirilgan. Oʻzaro muloqot jarayonida haydovchi N.Q.ning ogʻzidan spirtli ichimlik hidi kelayotganligini xodim payqagan va uni tekshiruvdan oʻtishga taklif qilgan.

Narkolog shifokorning tekshiruv xulosasiga koʻra, ushbu haydovchi spirtli ichimlikdan mast holdaligi tasdiqlangan. YPX xodimi tomonidan haydovchiga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksning 131-moddasi tartibida bayonnoma rasmiylashtirilib, yuk avtomobili ushbu Kodeksning 291-moddasiga koʻra, vaqtincha saqlash uchun jarima maydoniga qoʻyilgan.

Oradan 5 kun oʻtib, 2022-yilning 16-fevral kuni haydovchi maʼmuriy amaliyot xodimi O.Abdunazarovning yoniga kelib huquqbuzarligini yengilrogʻiga almashtirib berishini iltimos qilib, evaziga 3.000.000 (uch million) soʻm pul berishini taklif qilgan.

Shundan soʻng, xodim Surxondaryo viloyati IIB boshligʻi nomiga bildirgi orqali murojaat qilib, pora taklif qilayotgan fuqaroga nisbatan qonuniy chora koʻrilishini soʻragan.

Holat yuzasidan 16-fevral kuni soat 20:00 larda, huquqni muhofaza qiluvchi organ xodimlari tomonidan tezkor tadbir davomida, fuqaro N.Q. YPX xodimiga 200 (ikki yuz) AQSH dollari hamda 1.800.000 (bir million sakkiz yuz ming) soʻm pullarni pora tariqasida berayotgan vaqtda qoʻlga olingan.

Hozirda mazkur holat yuzasidan Termiz shahar prokuroturasi tomonidan tergovga qadar tekshiruv harakatlari olib borilmoqda.