Ijtimoiy tarmoqda tez tibbiy yordam avtomobillari tezlikni o‘lchovchi maxsus avtomatlashtirilgan, onlayn rejimida ishlovchi kameralar orqali qayd etilib, jarima belgilanayotganligi va ushbu jarimalar bekor qilinmayotganligi aytilgan xabar e’lon qilindi.

Joriy yilning 1-noyabr kuni O‘zbekiston Respublikasi IIV JXD YHXX boshlig‘i va Tez tibbiy yordam xizmati markazi rahbari hamda O‘zbekiston Respublikasi Sog‘liqni saqlash vazirligi avtotransport bo‘limi mas’ul xodimlari ishtirokida tez tibbiy yordam avtomobillarining maxsus foto-video fiksasiya moslamari orqali qayd etilgan yo‘l harkati qoidalarini buzish holatlari bo‘yicha kelib chiqayotgan muammolarni bartaraf etish yuzasidan uchrashuv bo‘lib o‘tdi.

Tez tibbiy yordam xodimlari tomonidan qonunda belgilangan tartibda, qoidabuzarlik bemorga yordam ko‘rsatish jarayonida sodir etilganligini tasdiqlovchi hujjatlarni ilova qilgan holda murojaat qilgan taqdirda jarima solish to‘g‘risidagi qarorlar bekor qilinishi yuzasidan tushunchalar berildi.

O‘zbekiston Respublikasi Ma’muriy javobgarlik to‘g‘risidagi Kodeksning 17 prim 1-moddasi beshinchi xatboshisiga ko‘ra, tezkor va maxsus xizmatlarning transport vositalari, shuningdek ular kuzatib kelayotgan transport vositalari tomonidan yo‘l harakati qoidalariga muvofiq imtiyozdan foydalangan holda sodir etilgan ma’muriy huquqbuzarliklar maxsus foto va video qayd etishning avtomatlashtirilgan texnik vositalari orqali qayd etilgan taqdirda hamda kechiktirib bo‘lmaydigan xizmat vazifalarini bajarganlikni tasdiqlovchi hujjatlar taqdim etilganda haydovchilarning ma’muriy qoidabuzarligi oxirgi zarurat holatlarida sodir etilgan deb topiladi va ma’muriy ish ushbu Kodeksning 271-moddasiga muvofiq tugatiladi.

Ushbu Kodeksning 271-moddasi birinchi xatboshisining to‘rtinchi kichik bandiga ko‘ra, shaxs harakatni zaruriy mudofaa holatida yoki oxirgi zarurat holatida qilgan bo‘lsa, ma’muriy huquqbuzarlik to‘g‘risidagi ishlarni yuritishni boshlash mumkin emas, boshlangan ish esa tugatilishi lozimligi belgilangan.

Ma’lumot o‘rnida, tezkor va maxsus xizmatlarning transport vositalari, shuningdek ular kuzatib kelayotgan transport vositalarining haydovchilari kechiktirib bo‘lmaydigan xizmat vazifalarini bajarayotib, harakatlanish xavfsizligini ta’minlash sharti bilan Qoidalarning 7-bobi (tartibga soluvchining ishoralaridan tashqari), 9-16, 19-20 va 22 boblari, 1 va 2-ilovalari talablaridan chetga chiqishlari mumkin.

Yo‘l harakatining boshqa qatnashchilariga nisbatan imtiyozga ega bo‘lishi uchun tezkor va maxsus xizmatlarning transport vositalarida, tezkor va maxsus xizmatlarning ko‘k yoki qizil yoxud ko‘k va qizil rangli yalt-yalt etuvchi mayoqchalar va maxsus tovushli ishora yoqilgan bo‘lishi shart.

Ular o‘zlariga yo‘l berilayotganligiga ishonch hosil qilganlaridan so‘nggina imtiyozdan foydalanishlari mumkin. Ushbu imtiyozdan tezkor va maxsus xizmatlarning ko‘k yoki qizil yoxud ko‘k va qizil rangli yalt-yalt etuvchi mayoqchalar va maxsus tovushli ishorasi yoqilgan transport vositalari tomonidan kuzatib kelinayotgan transport vositalarining haydovchilari ham foydalanadilar.

Yuqoridagilardan kelib chiqib, tez tibbiy yordam transport haydovchilari tomonidan sodir etilgan yo‘l harakati qoidabuzarliklari, ular tomonidan taqdim etilayotgan asoslantiruvchi hujjatlar asosida bekor qilinayotganligini ma’lum qilamiz.

Eslatib o‘tamiz, O‘zbekiston Respublikasi Ma’muriy Javobgarlik to‘g‘risidagi Kodeksning 128 prim 5-moddasi birinchi qismiga ko‘ra, tezkor va maxsus xizmatlarning ko‘k yoki qizil yoxud ko‘k va qizil rangli yaltiroq mayoqchani yoqqan holda hamda maxsus tovushli signal bilan yaqinlashib kelayotgan transport vositalari to‘siqsiz o‘tib ketishi uchun transport vositalari haydovchilari tomonidan xalaqit berish, — BHMning besh baravari miqdorida jarima solishga sabab bo‘ladi. Ushbu moddaning ikkinchi qismiga ko‘ra, yuqoridagi huquqbuzarlik ma’muriy jazo qo‘llanilganidan keyin bir yil davomida takror sodir etilsa, — BHMning yigirma besh baravari miqdorida jarima solishga yoki transport vositasini boshqarish huquqidan bir yil muddatga mahrum etishga sabab bo‘ladi.