Joriy yilning 16-fevral kuni Sariosiyo tumani, “Nelova” mahallasi hududida tezlikni meʼyoridan oshirgan haydovchilar boshqaruvidagi transport vositalarini qayd etuvchi radar moslamasi oʻrnatilgan avtomobil yoniga “Vaz-2106” rusumli transport vositasi haydovchisi toʻxtab, goʻyoki atrofdagi tezlik bilan bogʻliq qoidabuzarlikni tasvirga olishga halaqit berishga uringan.

Suhbat davomida mazkur avtomobil haydovchisi tezlikni qayd etuvchi radar qurilmalariga nisbatan norozi kayfiyatda boʻlganligi uchun bu xatti-harakatni sodir etganligini taʼkidladi.

Tahlillarga nazar tashlasak, sodir boʻlayotgan yoʻl-transport hodisalarining asosiy qismi tezlikni meʼyoridan oshirish bilan bogʻliq. Shunday ekan, yoʻllarda insonlar salomatligini asrash, yoʻl-transport hodisalarining oldini olish maqsadida tartibni nazorat qilishga moʻljallangan avtomatik tarzda ishlovchi maxsus qurilmalar yanada koʻpaytiriladi.

Ushbu maxsus qurilmalar ayrim tezyurar, qoidabuzar haydovchilarni tezlikni meʼyordan oshirmasdan harakatlanishlarini nazorat qilib, ularning qoidalarga rioya etishini va bu orqali salomatliklarini asrashni taʼminlamoqda.

Yuqoridagi videoda aks etgan holat boʻyicha haydovchiga oʻrnatilgan tartibda chora koʻrilib, tushuntirish ishlari olib borildi.

Barcha haydovchilardan qoidalarga rioya etishlarini soʻraymiz.