IIV JXD Yo‘l harakati xavfsizligi xizmati rahbari polkovnik Sherzod Ibragimov Toshkent shahar hududida joylashgan "Bektemir", "Erkin", "Uch qahramon", "Sharq" va "A.Turbanov" YPX maskanlariga borib, xodimlarning ish faoliyati bilan tanishdi.

O‘rganishlar davomida har bir maskandagi mavjud sharoitlar, texnik vositalar va ulardan foydalanish samaradorligi o‘rganildi. Xodimlar bilan uchrashuvlarda ish jarayonida uchrayotgan muammolar va ularning yechimlari muhokama qilindi. Shuningdek, xizmat intizomi va qonunchilikka amal qilish, korrupsion holatlarga yo‘l qo‘ymaslik, fuqarolar bilan xushmuomalada bo‘lish haqida alohida to‘xtalib, zarur ko‘rsatma va topshiriqlar berildi.

Shundan so‘ng, YHXX boshlig‘i "Toshkent" avtovokzaliga borib, yo‘lovchilar uchun yaratilgan qulayliklar, avtobuslarning holati va tozaligi, yo‘l kira narxi hamda xavfsizlik chora-tadbirlari bilan tanishdi.

Yo‘lovchi tashish faoliyati bilan shug‘ullanuvchi haydovchilar bilan uchrashib, ularni yanada mas’uliyatli bo‘lishga chaqirdi. Tashrif yakunida, mavjud kamchiliklarni bartaraf etish va xizmat samaradorligini oshirish uchun zarur bo‘lgan chora-tadbirlarni tezkor amalga oshirish bo‘yicha topshiriqlar berildi.