“NazoratUzOfficial” telegram kanalida IIV JXD YHXX boshligʻi Saidov Olim Choriqulovich fotosurati hamda unga tegishliligi aytilgan “vizitka” koʻrinishi eʼlon qilingan xabar yuzasidan munosabat.

Xabarda “Ushbu vizitka xaqiqatdan xam Siznikimi yoki u aslida nima maqsadlarda foydalaniladi? Kimlarga beriladi? Vizitkani ahamiyatga molik tomoni nimada? Agarda qalbaki boʻlsa, kim tomonidan qanday maqsadda qilingan? Yuqoridagi holat boʻyicha, IIV JXD YHX xizmatidan rasmiy munosabat berilishi soʻraladi!” deya keltirilgan savollar boʻyicha quyidagilarni maʼlum qilamiz:

“Oʻzbekiston Respublikasi IIB Yoʻl harakati xavfsizligi boshqarmasi boshligʻi” - deya notoʻgʻri lavozim koʻrsatilganligi ham ushbu qogʻozning sohta va firibgarlik maqsadida tayyorlanganligining yaqqol isbotidir (toʻgʻri nomlanishi — Oʻzbekiston Respublikasi IIV JXD Yoʻl harakati xavfsizligi xizmati boshligʻi).

Mazkur “vizitka” bilan bogʻliq holat joriy yilda YPX xodimi tomonidan aniqlangan va tegishli tartibda bildirgi orqali maʼlum qilingan.

Xodimning bildirgisi asosida tergovga qadar tekshiruv harakatlari olib borilib, Chilonzor tumani IIO FMB huzuridagi Tergov boʻlimi tomonidan 1996-yilda tugʻilgan S.O.ga nisbatan Oʻzbekiston Respublikasi Jinoyat Kodeksining 168-moddasi 3-qismi “b” bandi (Takroran firibgarlik sodir etish) bilan jinoyat ishi qoʻzgʻatilib, hozirda tergov harakatlari olib borilmoqda.

Suratda aks etgan “vizitka” sohta boʻlib, IIV JXD YHXX boshligʻi Saidov Olim Choriqulovichga tegishli emas.

Tashrif qogʻozi hech qanday huquqiy ahamiyatga ega emasligini va hech kimga muayyan huquq hamda imtiyoz bermasligini maʼlum qilamiz.

Agarda “vizitka” bilan bogʻliq holatga duch kelsangiz 102 raqamiga yoki IIV JXD YHXXning (71) 267-60-10 raqamiga qoʻngʻiroq qilib xabar berishingizni soʻraymiz.

Ayrim ijtimoiy tarmoq obunachilaridan asoslantirilmagan, aniqlik kiritilmagan maʼlumotlarni turli nooʻrin izohlar bilan omma eʼtiboriga tarqatmaslikni soʻraymiz.

Shaxsning qadr-qimmati kamsitilishiga yoki uning obroʻsizlantirilishiga olib keladigan yolgʻon axborotni tarqatish javobgarlikka sabab boʻlishini eslatib oʻtamiz.