Yig‘ilish O‘zbekiston Respublikasi Prezidentining 2022-yil 4-apreldagi “Avtomobil yo‘llarida inson xavfsizligini ishonchli ta’minlash va o‘lim holatlarini keskin kamaytirish chora-tadbirlari to‘g‘risida”gi PQ-190-son qarori ijrosi doirasida tashkil etildi.

Yig‘ilishda Xorazm viloyati hokimi Jo‘rabek Rahimov, O‘zbekiston Respublikasi IIV JXD Yo‘l harakati xavfsizligi xizmati boshlig‘i polkovnik Sherzod Ibragimov, viloyat Ichki ishlar boshqarmasi boshlig‘i polkovnik Abdumajid Shermuxamedov, shuningdek, shahar va tuman hokimlari, tegishli vazirlik, idora va tashkilotlar rahbarlari hamda mas’ul xodimlar ishtirok etdi. Shahar-tuman IIB rahbarlari va ularning o‘rinbosarlari yig‘ilishda videoaloqa orqali qatnashdilar.

Muhokamalar davomida 2025-yil davomida viloyat hududida sodir etilgan yo‘l-transport hodisalari har tomonlama tahlil qilinib, og‘ir oqibatli YTHlar, yo‘l qoplamasi va infratuzilmasidagi kamchiliklar, haydovchilar va piyodalar tomonidan sodir etilayotgan qoidabuzarliklar aniq misollar asosida ko‘rib chiqildi. Ayniqsa, bolalar ishtirokidagi yo‘l-transport hodisalari, ularning kelib chiqish sabablari hamda profilaktika ishlarining samaradorligi masalalari tanqidiy ruhda muhokama etildi.

IIV JXD Yo‘l harakati xavfsizligi xizmati rahbariyati tomonidan viloyatda harakat xavfsizligini ta’minlash borasida amalga oshirilayotgan ishlar, jumladan yo‘l belgilarini o‘rnatish, piyodalar o‘tish joylarini tashkil etish, xavfli uchastkalarda sun’iy notekisliklar barpo etish, svetoforlarni o‘rnatish hamda aholi o‘rtasida profilaktik tushuntirish ishlarini olib borish holatiga alohida e’tibor qaratildi. Shu bilan birga, ayrim hududlarda belgilangan vazifalarning to‘liq bajarilmayotgani tanqid ostiga olindi.

Yig‘ilishda so‘zga chiqqan viloyat hokimi Jo‘rabek Rahimov yo‘l harakati xavfsizligi masalasi aholi hayoti va sog‘lig‘ini muhofaza qilishda ustuvor ahamiyatga ega ekanini ta’kidlab, barcha mutasaddi tashkilotlar o‘zaro hamkorlikda, tizimli va samarali ish olib borishi zarurligini qayd etdi.

Yig‘ilish yakunida aniqlangan kamchiliklar va muammolarni bartaraf etish, PQ-190-son qaror ijrosini to‘liq ta’minlash bo‘yicha mas’ul rahbarlarga aniq vazifa va topshiriqlar berildi hamda belgilangan chora-tadbirlar ijrosi yuzasidan qat’iy nazorat o‘rnatilishi belgilandi.