2023-yil 20-iyul kuni soat 13:20 larda "Namangan" YPX maskanida "Lacetti" rusumli avtomobil haydovchisi to‘xtatilib tekshirilganda, tegishli hujjatlari bo‘lmagan 345 quti tamaki mahsulotlari olib ketilayotganligi aniqlangan.

Ushbu holatni rasmiylashtirish mobaynida haydovchi, 1991-yilda tug‘ilgan R.T. YHXX "Qamchiq" dovoni bo‘yicha YPX xodimi D.Sultanovga hujjatlarni rasmiylashtirmaslik, avtomobilini jarima maydonidan olib chiqish va noqonuniy tarzda olib ketilayotgan tamaki mahsulotlarini qaytarib olish evaziga 600 AQSH dollari miqdoridagi pullarni pora tariqasida taklif qilgan. Xodim ushbu harakat noqonuniy ekanligini tushuntirishiga qaramasdan haydovchi pora taklif qilishda davom etgan.

Shundan so‘ng, D.Sultanov O‘zbekiston Respublikasi IIV SHXBB Namangan viloyati bo‘yicha boshqarmasi boshlig‘i nomiga bildirgi bilan murojaat qilib, pora taklif qilayotgan haydovchiga qonuniy chora ko‘rilishini so‘ragan.

Xodimning bildirgisiga asosan sohaviy xizmatlar bilan hamkorlikda tezkor tadbir o‘tkazilib, haydovchi R.T. YHXX xodimi D.Sultanovga taklif qilingan 600 AQSH dollaridan 500 AQSH dollari miqdoridagi pullarni berayotgan vaqtda ashyoviy dallilar bilan ushlangan.

Mazkur holat yuzasidan Pop tumani prokuraturasi tomonidan O‘zbekiston Respublikasi Jinoyat Kodeksining 211-moddasi bilan jinoyat ishi ko‘zg‘atilib, tergov harakatlari olib borilmoqda.