Toshkent shahar IIBB JXX YHXBda navbatdagi yo‘riqnoma bo‘lib o‘tdi. Unda IIV JXD YHXX rahbariyati tomonidan yo‘llarda harakat xavfsizligini ishonchli ta’minlash, fuqarolarni turli noxush hodisalardan himoya qilish — Yo‘l-patrul xizmati xodimlarining eng ustuvor va dolzarb vazifasi ekani yana bir bor ta’kidlab o‘tildi.

Xizmat davomida har bir xodim amaldagi qonunchilik talablariga qat’iy amal qilishi, intizom va odob-axloq me’yorlariga rioya etgan holda o‘z xizmat majburiyatlarini bajarishi zarurligi alohida qayd etildi.

Joriy yil 24-iyun kuni Farg‘ona viloyati Buvayda tumanida yo‘l chetiga to‘xtagan "Nexia" haydovchisi avtomobilni o‘chirmasdan, do‘konga kirib ketgan. Shu vaqtda, oldingi o‘rindiqda qolgan 5 yoshli o‘g‘li oyna ko‘targich tugmasini bosib yuborgan. Natijada bolaning boshi qisilib qolgan. Hodisani ko‘rib, tezkorlik bilan harakat qilib, avtomobil oynasini sindirib, bolani qutqarib qolgan YPX xodimi Azim Xalifayev taqdirlandi.

Shuningdek, xizmat faoliyatida namunali ish yuritib kelayotgan, o‘zining fidoyiligi, sadoqati va yuqori professionalligi bilan ajralib turgan bir guruh YPX xodimlari rag‘batlantirildi.

Ularning samarali faoliyati, o‘z oldiga qo‘yilgan vazifalarni mas’uliyat bilan bajarayotgani, shuningdek, jamoada sog‘lom muhitni shakllantirishdagi hissasi e’tirof etilib, minnatdorchilik bildirildi.