2022-yil 13-aprel kuni Andijon viloyati, Xoʻjaobod tumanida xizmat olib borayotgan YPX xodimi A.Turakulxadjayev tomonidan “Lacetti” rusumli avtomobil toʻxtatilib tekshirilganda, haydovchi, 1974-yilda tugʻilgan D.X.ning meʼyoriy hujjatlari yoʻqligi aniqlangan.

YPX xodimi tomonidan haydovchiga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksning 135-moddasi tartibida bayonnoma rasmiylashtirilib, avtomobili ushbu Kodeksning 291-moddasiga koʻra, vaqtincha saqlash uchun jarima maydoniga qoʻyilgan.

Shundan soʻng, haydovchi YPX xodimining yoniga kelib, huquqbuzarligini yengilrogʻiga almashtirib berishini va avtomobilini jarima maydonidan chiqarib yuborishini iltimos qilib, evaziga 100 AQSH dollar pul berishini taklif qilgan.

Xodim Andijon viloyati IIB boshligʻi nomiga bildirgi orqali murojaat qilib, pora taklif qilayotgan fuqaroga nisbatan qonuniy chora koʻrilishini soʻragan.

Holat yuzasidan 2022-yil 13-aprel kuni soat 12:00 larda, huquqni muhofaza qiluvchi organ xodimlari tomonidan oʻtkazilgan tezkor tadbir davomida, haydovchi D.X.ning tanishi boʻlgan fuqaro, 1981-yilda tugʻilgan Sh.K. YPX xodimiga 100 AQSH dollar miqdordagi pulni pora tariqasida berayotgan vaqtda qoʻlga olingan.

Hozirda mazkur holat yuzasidan Andijon viloyati prokuraturasi tomonidan tergovga qadar tekshiruv harakatlari olib borilmoqda.