Poytaxtda aholidan elektr, gaz va issiq suv taʼminotidagi uzulishlar boʻyicha kelib tushayotgan murojaatlarni qisqa muddatlarda bartaraf etish boʻyicha huquq-tartibot va sogʻliqni saqlash idoralari, gaz, elektr energiya, ichimlik suvi va kommunal xoʻjalik korxonalari vakillaridan iborat ishchi guruhlari tashkil etildi.

Viloyatlar Yoʻl harakati xavfsizligi boshqarmalarining ekspluatatsiya va montaj boʻlimlariga tegishli boʻlgan maxsus koʻtaruvchi texnikalar poytaxtga olib kelinib, tumanlar kesimida taqsimlandi. Shuningdek, hududlardan elektr tarmoqlari boʻyicha mutaxassislar amaliy yordamga jalb etilgan boʻlib, birgina Yunusobod tumanida Namangan viloyatidan kelgan mutaxassislar tuman hududida samarali yordam koʻrsatishmoqda.

Elektr taʼminotidagi uzulishlar batafsil oʻrganilib, ularning koʻpchiligida kabellar bilan bogʻliq muammolar borligi aniqlandi. Zudlik bilan yangi, chidamli kabellar olib kelinib, mutaxassislar tomonidan eskirganlarini yangilash choralari koʻrilmoqda.

Turli soha vakillari birlashib, rejali ishlar amalga oshirilmoqda. Maqsad bitta – yuzaga kelgan nosozliklarni bartaraf etish orqali aholi uchun qulaylik yaratish.