Ижтимоий тармоқда кўчалар ва йўлларда хизмат олиб бораётган ИИБ ходимлари ҳанузгача қишки мавсум учун кийим-бош киймаганликлари айтилган хабар эълон қилинди.

Мазкур хабар юзасидан қуйидагиларни маълум қиламиз:

- республикадаги барча гарнизон бошлиқларининг қишки кийим-кечак кийиш русумига ўтиш тўғрисидаги тегишли буйруғи шахсий таркиб ходимларига етказилган;

- кўчаларда, йўлларда хизмат олиб борувчи барча ходимлар қишки мавсумга мўлжалланган иссиқ кийим-бошлар билан таъминланган (маълумот учун, ходимлар мавсумий кийим-бошлар билан Ички ишлар вазирининг тегишли буйруғи асосида белгиланган муддатларда доимий таъминланади);

- Ички ишлар вазирлиги Жамоат хавфсизлиги департаменти таркибига кирувчи Йўл ҳаракати хавфсизлиги, Ҳуқуқбузарликлар профилактикаси ва Жамоат тартибини сақлаш хизматларининг ходимларини янги намунадаги кийим-бош билан таъминлаш бўйича ишлар жадаллик билан олиб борилмоқда;

- ходимлар қишки кийим-бош билан хизмат олиб боришлари Ички ишлар вазирлиги Жамоат хавфсизлиги департаменти раҳбарияти томонидан назоратга олинган.

Ходимларнинг саломатлиги учун қайғураётган жамоатчилик вакилларига миннатдорчилик билдирамиз.