Qashqadaryo viloyati, Yakkabogʻ tumanida YPX xodimlari va qonuniy talabga boʻysunmagan “Nexia-3” rusumli avtomobil haydovchisi oʻrtasida ziddiyatli vaziyat yuzaga kelganligi hamda atrofda boʻlgan ayrim shaxslar xodimlarning xizmat vazifasini bajarishga halaqit berganligi holati boʻyicha toʻplangan hujjatlar bugun, 2022-yil 16-fevral kuni Jinoyat ishlari boʻyicha Yakkabogʻ tuman sudi tomonidan oʻrganib chiqildi.

“Nexia-3” rusumli avtomobil haydovchisi, 1990-yilda tugʻilgan N.X.ning xatti-harakatlarida Oʻzbekiston Respublikasi Maʼmuriy javobgarlik toʻgʻrisidagi Kodeksning 194-moddasi 1-qismi hamda 195-moddasida koʻrsatilgan huquqbuzarlik alomatlari mavjud deb topilib, unga nisbatan 14 sutka maʼmuriy qamoq jazosi tayinlandi. Shuningdek, 1985-yilda tugʻilgan F.U. hamda 1987-yilda tugʻilgan A.B.larning xatti-harakatlarida Oʻzbekiston Respublikasi Maʼmuriy javobgarlik toʻgʻrisidagi Kodeksning 194-moddasi 1-qismida koʻrsatilgan huquqbuzarlik alomatlari mavjud deb topilib, ularning har biriga BHMning 3 baravari miqdorida (810.000 soʻm) jarima jazosi tayinlandi.

Barcha harakat qatnashchilaridan yoʻllarda qoidalarga rioya qilishlarini, IIO xodimlarining qonuniy talablarini bajarishlarini, shuningdek, uchinchi shaxs sifatida xodim va haydovchi oʻrtasidagi oʻzaro suhbat hamda jarayonlarga aralashib, YPX inspektorlarining faoliyatiga halaqit bermaslikni soʻraymiz.